CONDICIÓNS DE USO

Información xeral

A Fábrica Nacional de Moeda e Timbre-Real Casa da Moeda (en diante FNMT-RCM) é un organismo público, entidade pública empresarial, con personalidade xurídica pública diferenciada, patrimonio e tesourería propios e autonomía de xestión, adscrita ao Ministerio de Facenda e Función Pública, a través da Subsecretaría dese departamento.

Os datos da FNMT-RCM son:

• Fábrica Nacional de Moneda y Timbre-Real Casa de la Moneda
• NIF/CIF: Q2826004J
• Domicilio: Calle Jorge Juan 106, C.P. 28009, Madrid
• Enderezo electrónico: atención a usuarios info@fnmt.es
• Sitio Web: http://www.fnmt.es

Condicións de uso

Ao premer na opción de aceptar para realizar o proceso de verificación e identificación para a obtención da credencial de identidade verificable está aceptando tamén a política de privacidade, protección de datos e estas condicións de uso relacionadas. Non aceptar estas condicións supón que non poderá ter acceso ao servizo ou produto solicitado.

O uso responsable das acreditacións, credenciais ou outros produtos da FNMT-RCM fóra das finalidades para as que foron adquiridos ou contratados correspóndelle ao seu usuario, que exime a FNMT-RCM, os seus colaboradores e aqueles operadores ou empresas contratados por ela para a prestación dos seus servizos ou elaboración dos produtos da entidade pola súa utilización indebida.

O uso de credenciais, acreditacións ou outros produtos da FNMT-RCM que sexan de adscrición persoal e intransferible por unha persoa que non sexa a súa titular implica a perda desa credencial, acreditación ou produto, salvo que se demostre que se utilizaron sen o consentimento da persoa titular.

A FNMT-RCM non se fai responsable dun uso ilícito das credenciais, acreditacións e outros produtos ofertados por ela; é vostede o encargado de velar pola súa correcta utilización e custodia. No caso de producirse un acceso ilícito ou utilización dos nosos produtos sen o seu consentimento, deberá de poñerse en contacto con nós coa maior brevidade posible.

Como usuario comprométese a utilizar as credenciais de acordo cos termos establecidos nestas condicións de uso, a normativa vixente aplicable e os principios da ética, o respecto e os usos sociais.

Tamén se compromete a nonusar as credenciais co fin de causarlles danos e perdas a terceiras persoas, equipos informáticos ou programas propios da FNMT-RCM ou de operadores contratados por ela ou dos seus colaboradores.

Queda prohibido o uso de marcas, logotipos, software, deseños e calquera outro tipo de material cuxa titularidade pertenza á FNMT-RCM, operadores contratados por ela ou aos seus colaboradores, salvo que haxa unha autorización expresa pola súa parte, así como calquera conduta ou actividade contraria ao establecido na normativa sobre propiedade industrial e intelectual.

Acceso ao servizo

Para obter as credenciais de identidade verificables da FNMT-RCM debe de ser maior de idade legalmente en España (18 anos) e realizar un proceso de verificación de identidade previo. Para acceder a ese proceso, débense de aceptar previamente a política de privacidade, protección de datos e as presentes condicións de uso, así como a política de cookies do sitio web.

A FNMT-RCM, directamente ou por medio de operadores contratados por ela, verificará a identidade do solicitante.

A verificación da identidade basearase nun recoñecemento facial mediante procedementos biométricos e a achega do documento de identidade. Esta acreditación realizarase respectando en todo momento a normativa vixente de protección de datos persoais e debe aceptar a política de privacidade e protección de datos de forma previa ao seu tratamento.

Os datos persoais obtidos para realizar a verificación de identidade serán almacenados pola FNMT-RCM durante os prazos de tempo establecidos pola normativa específica de aplicación.

Credenciais de identidade verificables

Unha vez que se verifica a identidade como usuario, obterá a credencial de identidade verificable para a realización de trámites non administrativos no ámbito universitario e almacenarase na súa carteira dixital. Vostede será o único responsable desta e do seu contido.

Prestación de servizos e actualizacións

A FNMT-RCM comprométese a prestar os servizos necesarios para o uso de credenciais, acreditacións e outros produtos, sen prexuízo de posibles fallos do sistema, caídas do servizo ou indispoñibilidade, e realizará as actuacións necesarias para o seu restablecemento no menor tempo posible.

Se se producen actualizacións de software, renovación de credenciais ou calquera outra actividade encamiñada ao mantemento actualizado do servizo ou produto, é vostede o responsable de realizar as actuacións necesarias para esa finalidade. Se os seus equipos ou o software non están actualizados para a prestación dos servizos ou a utilización dos nosos produtos, a FNMT-RCM non se fai responsable de posibles fallos ou servizo ineficiente.

A FNMT-RCM comprométese a establecer as medidas de seguridade máis adecuadas para evitar brechas, acceso ilícito ou ciberataques, sempre dentro do razoable. Non obstante, non pode garantir que a seguridade sexa absolutamente infalible.

A FNMT-RCM non se fai responsable de fallos ou infeccións por virus ou outro software malicioso que se albergue nos equipos do usuario.

Exención de responsabilidade

A FNMT-RCM non se fai responsable, coas excepcións establecidas pola normativa vixente, dos danos e perdas que se poidan producir pola prestación do servizo, outorgamento de credenciais, acreditacións ou outros produtos ofertados pola FNMT-RCM.

A FNMT-RCM porá todas as medidas ao seu alcance, dentro dos límites razoables, para evitar que se produzan ataques informáticos, infección por virus ou outro software malicioso durante a prestación dos servizos que oferta. Non obstante, a FNMT-RCM non pode garantir plenamente que non se produzan esas situacións.

Resolución de conflitos, xurisdición e competencia

Os conflitos que puidesen xurdir da prestación dos servizos da FNMT-RCM ou utilización dos seus produtos, directamente ou por medio de operadores contratados por ela ou dos seus colaboradores, resolveranse perante os xulgados e tribunais de Madrid capital. As partes renuncian, de forma expresa, ao foro que lles puidese corresponder, sen prexuízo do establecido na lexislación sobre consumidores e usuarios que puidese afectarlles.